बुधबार १४, साउन २०७७ ०६:१४
काठमाडाैं । सत्तारुढ दल नेकपाको विवाद उत्कर्षमा पुगेकै बेला केन्द्रीय कमिटी बैठक माग गर्दै १५२ केन्द्रीय सदस्यले हस्ताक्षर बुझाएका छन् । बुधबार दिउसो पार्टी कार्यालय धुम्बाराही पुगेर अध्यक्षद्वयलाई संवोधन गर्दै १५२ सदस्यहरूले हस्ताक्षर बुझाएका छन् ।
असार १० बाट सुरु भएको स्थायी कमिटी बैठक अनिर्णित भएको बेला केन्द्रीय कमिटी बैठक माग भएको हो ।
बैठक माग गर्दै हस्ताक्षर बुझाउने सदस्यहरु अध्यक्ष पुष्पकमल दाहाल र वरिष्ठ नेता माधवकुमार नेपाल समूहका छन् ।
प्रधानमन्त्री र पार्टी अध्यक्ष दुवैबाट राजीनामाको माग भएपछि स्थायी कमिटी बैठक लगातार स्थगित हुदै आएको छ । त्यहीबेला केन्द्रीय कमिटी बैठकको माग भएको हो ।
केन्द्रीय कमिटीको एक चौथाइ सदस्यले बैठक माग गरेपछि ३० दिनभित्र बैठक बोलाउनु पर्ने विधानमा छ । नेकपामा ४४४ जनाको केन्द्रीय कमिटी रहेको छ ।
प्रतिकृया दिनुहोस