- विशेष खबर बुधबार ०८, माघ २०८२ ०९:१८
बैतडी । नेपाली कांग्रेस बैतडीले आसन्न निर्वाचन केन्द्रीत छलफलका लागि बृहत भेला बोलाएको छ ।
माघ १० गते विहान १० बजेदेखि पाटन नगरपालिकाको एकीकृत सभाहलमा बृहत भेला आयोजना गरेको हो ।
भेलामा पार्टी र भातृ संस्थाका वडादेखि केन्द्रसम्मका पदाधिकारीलाई बोलाइएको हो । कांग्रेसबाट निर्वाचित जनप्रतिनिधिसहित पार्टीका पूर्व पदाधिकारीहरुलाई उपस्थितिका लागि आव्हान गरेको छ।
बैतडीमा कांग्रेस जिल्ला सभापति चतुरबहादुर चन्द प्रतिनिधिसभा सदस्य उम्मेदवार छन् ।
नेपाल क्रिकेट संघ (क्यान) का अध्यक्ष समेत रहेका चन्द पहिलो पटक संसदीय निर्वाचन लड्न लागेका हुन् । शिक्षण पेशासँगै क्रिकेटको विकासमा सक्रिय रहेका चन्द २०७४ मा शिक्षकबाट अवकाश लिएर सक्रिय राजनीतिमा आएका थिए।
त्यसअघि नेपाल शिक्षक संघको जिल्ला अध्यक्ष हुँदादेखि उनी जिल्लाको राजनीतिमा प्रभाव राख्दै आएका छन् । शिक्षक संघको नेतृत्वमा रहँदा गाउँगाउँसम्म प्रभाव बढाएका चन्द पछिल्लो समय नेपाली क्रिकेटको सफलताको कारण झन् बढी लोकप्रिय भएका छन् ।
चन्द उम्मेदवारीले कांग्रेस नेता कार्यकर्ता उत्साहित भएका छन् । गत निर्वाचन माओवादीसितको गठबन्धनको कारण हसिँया हथौडमा भोट हालेका कांग्रेस कार्यकर्ता यसपाली प्रभावशाली नेता उम्मेदवार बन्दा उत्साहित देखिएका छन् ।
माघ १० को भेलामा पार्टी र भातृ संस्थाका ८४ वटै वडादेखि प्रदेश र केन्द्रीय तहका सबै नेता-कार्यकर्ताहरुलाई अनिवार्य उपस्थितिको आग्रह गरिएको कांग्रेस बैतडीका जिल्ला सचिव प्रेमबहादुर चन्दले बताए ।
प्रतिकृया दिनुहोस