- विशेष खबर मङ्गलबार २२, चैत २०७८ ०७:२४
काठमाडौं । नेपाल प्रहरीका तीन अतिरिक्त महानिरीक्षक (एआइजी) का लागि भएको बढुवा सिफारिसविरुद्ध परेको रिट निवेदनमा सर्वोच्च अदालतले अन्तरिम आदेश दिन अस्वीकार गरेको छ ।
प्रहरी नायव महानिरीक्षक (डीआईजी) त्रय ईश्वरबाबु कार्की, घनश्याम अर्याल र प्रकाशजंग कार्कीले दायर गरेको रिटमा न्यायाधीश कुमार चुडालले सुनुवाइ गरेको थियो । डीआईजीहरूले माग गरेबमोजिम आदेश दिन भने न्यायाधीश चुडालको इजलासले अस्वीकार गरेको छ ।
सरकारले वरिष्ठता र कार्य क्षमताको आधारमा नभई गैरकानुनीरूपमा बढुवा गरेको दाबी गर्दै उनीहरूले रिट दायर गरेका थिए । सरकारले डीआइजीहरू वसन्तकुमार पन्त, धीरजप्रताप सिंह र रवीन्द्रबहादुर धानुकलाई एआइजीमा बढुवा गर्ने निर्णय गरेको थियो । उनीहरूलाई एआईजीमा बढुवा गरिसकिएको छ ।
सर्वोच्च अदालतले उक्त रिट निवेदनमा विपक्षीहरूलाई कारण देखाउ आदेश जारी गरेको छ । अन्तरिम आदेशका लागि छलफल गर्न दुवै पक्षलाई अदालतले चैत २८ गतेका बोलाएको छ ।
प्रतिकृया दिनुहोस