बुधबार २८, असोज २०७७ ११:१७
बैतडी । सूर्नया गाउँपालिका केन्द्रको विषयलाई लिएर बुधबार झडप हुँदा गाउँपालिका अध्यक्षसहित १४ जना घाइते भएका छन् ।
गाउँ सभाले ताेकेकाे केन्द्र मान्य नभएकाे भन्दै संघर्षरत पक्षले लगाएको ताला खोल्न जाँदा गाउँपालिका अध्यक्ष बीरबहादुर बिष्टमाथि ढुंगा प्रहार भएको हाे । उनकाे टाउकोमा चोट लागेकाे प्रहरीले जनाएको छ ।
गाउँपालिकाकाे केन्द्र वडा नं. ५ कै पवितामा सार्न खोजेको भन्दै अहिले कार्यालय रहेकाे क्षेत्रका बासिन्दाले मंगलबार पालिकामा तालाबन्दी गरेका थिए । केन्द्रका बिषयमा बुधबार भएकाे छलफल निष्कर्षमा नपुगेपछि ताला खोल्न खोज्दा झडप भएको प्रहरीले जनाएको छ ।
झडपमा ४ जना प्रहरी पनि घाइते भएका छन् । केन्द्र सार्न नपाइने माग गर्दै संघर्षरत पक्षका ६ जना र अन्य तीन जना पनि घाइते भएकाे स्थानीयले बताएका छन् ।
स्थिति तनाबग्रस्त बनेपछि प्रहरी निरीक्षक धनदेव साउँदको नेतृत्वमा टाेली पठाएकाे छ । घटनास्थलमा सशस्त्र प्रहरी टाेली समेत गएकाे जिल्ला प्रहरी प्रमुख डीएसपी नारायणप्रसाद अधिकारीले बताए ।
गत वर्ष नै पालिकाको केन्द्र पवितामा राख्ने कार्यपालिकाले निर्णय गरेको थियो । त्यसकाे बिराेधमा स्थानीयले सर्बाेच्चमा दिएकाे मुद्दा विचाराधीन छ ।
प्रतिकृया दिनुहोस