- विशेष खबर शनिबार १८, कार्तिक २०८० ०७:१६
काठमाडाैं । जाजरकोटलाई केन्द्र बनाएर शुक्रबार राति गएको भूकम्पमा परी जाजरकोट र रुकुम पश्चिममा गरेर अहिलेसम्म ८० जनाको ज्यान गएको छ । करिब डेढ सय जना घाइते भएका छन् ।
जाजरकोटका प्रहरी प्रमुख डीएसपी सन्तोश रोकाका अनुसार जाजरकोटमा मात्रै अहिलेसम्म ४४ जनाको ज्यान गएको पुष्टि भएको छ ।
ज्यान गुमाउनेहरूमा भेरी नगरपालिकाका ३०, नलगाड नगरपालिकाका ६, कुशे गउँपालिकाका ७ र छेडागाड नगरपालिकाका १ जना रहेको डीएसपी रोकाले बताए । भूकम्पमा परी जाजरकोटमा ५५ जना घाइते भएको बताइएको छ ।
छिमेकी जिल्ला रुकुम पश्चिममा पनि भूकम्पले ठूलो क्षति गरेको छ । रूकुम पश्चिमका प्रहरी प्रमुख डीएसपी नमराज भट्टराईका अनुसार अहिलेसम्म ३६ जनाको मृत्यु भएको छ ।
जाजरकोटसँग जोडिएका आठबीसकोट नगरपालिकामा ३६ र सानीभेरी गाउँपालिकामा ८ जनाको ज्यान गएको डीएसपी भट्टराईले बताए ।
रुकुम पश्चिममा भूकम्पमा झण्डै सय जना घाइते भएका छन् । गम्भीर घाइतेकाे हेलिकप्टरमार्फत उद्धार गर्ने तयारी भइरहेको छ ।
सुरक्षाकर्मीहरू उद्धारमा खटिएका छन् । भूकम्पका कारण मध्यपहाडी लोकमार्गको कालेखोलामा सुख्खा पहिरो जाँदा सडक अवरुद्ध भएको छ भने, रुकुम पश्चिमको आठबीसकोट जाने सडक पनि दुई स्थानमा पहिरो जाँदा अवरुद्ध छ ।
मध्यरातकाे घटना भएकाले उद्धारमा कठिनाइ भएकाे छ । क्षतिकाे विवरण अाउने क्रम जारी छ ।
राष्ट्रिय भूकम्प मापन केन्द्रका अनुसार शुक्रबार राति ११ः४७ बजे जाजरकोटको रामेडाँडा आसपास केन्द्रबिन्दु भएर ६.४ म्याग्निच्यूडकाे भूकम्प गएकाे हाे । भूकम्पकाे धक्का काठमाडाैंदेखि भारतको दिल्लीसम्म महशुस गरिएकाे थियाे ।
प्रतिकृया दिनुहोस