- विशेष खबर सोमबार ०४, बैशाख २०८० १०:३४
चितवन । राष्ट्रिय स्वतन्त्र पार्टी (रास्वपा)का सभापति तथा चितवन-२ को उपचुनावका उम्मेदवार रहेका रवि लामिछानेका गाडी चालक घरको छतबाट लडेर सख्त घाइते भएका छन् ।
लामिछाने बस्दै आएको भरतपुर महानगरपालिका-११ को ३ तले घरको छतबाट खसेर चालक सिन्धुपाल्चोक बाह्रबिसे नगरपालिका-३ घर भएका ३९ वर्षीय शम्भु भन्ने दिलबहादुर थापा सख्त घाइते भएको चितवन जिल्ला प्रहरी कार्यालयका प्रवक्ता डिएसपी विजयराज पण्डितले बताए ।
साेमबार बिहान चार बजेतिर भएको घटनामा चालक थापाकाे खुट्टा र टाउकाेमा गम्भीर चोट लागेको प्रहरीले जनाएको छ । उनको भरतपुर पुरानो मेडिकल कलेजको शिक्षण अस्पतालमा उपचार भइरहेको डिएसपी पण्डितले बताए । घटनाको अनुसन्धानका लागि एसपी नेतृत्वकै टोली खटिएको छ ।
तीन तले उक्त घरकाे माथिल्लो तलामा चालक थापा सुतेका थिए । उनीसँगै अर्का चालक पनि सुतेको डिएसपी पण्डितले बताए । घटना कसरी भयो भन्ने बारे अनुसन्धानपछि सार्वजनिक गर्ने उनको भनाइ छ ।
प्रतिकृया दिनुहोस