- विशेष खबर बुधबार २६, माघ २०७८ ०९:१०
काठमाडौं । उच्च सरकारी वकिल कार्यालय पोखराका तत्कालीन सहन्यायाधिवक्ता सुरेन्द्रबहादुर थापाविरुद्ध अख्तियार दुरुपयोग अनुसन्धान आयोगले गैरकानुनी रुपमा सम्पत्ति आर्जन गरेको कसुरमा मुद्दा दायर गरेको छ ।
२०४५ असार ५ मा सरकारी सेवा प्रवेश गरेका थापाविरुद्ध अख्तियारले बुधबार ६१ लाख २ हजार ७६ रुपैयाँ बिगो कायम गरी विशेष अदालतमा मुद्दा दायर गरेको हो ।
अख्तियारले थापाविरुद्ध सेवा प्रवेश गरेदेखि २०७५ सम्मको सम्पत्तिमाथि छानबिन गरेको थियो । २०७५ असोज २४ मा सहन्यायाधिवक्ता थापा ५ लाख घूससहित पोखराबाट रंगेहात पक्राउ परेका थिए । ठगीसम्बन्धी मुद्दा पुनरावेदन नगर्ने सर्तमा आरोपितबाट ५ लाख घूस लिँदालिँदै अख्तियारको टोलीले थापालाई पक्राउ गरेको थियो । विशेषमा मुद्दा दायर भएपछि उनी निलम्बनमा परेका थिए । त्यही क्रममा थापाविरुद्ध गैरकानुनी सम्पत्ति आर्जन गरेको कसुरमा पनि उजुरी परेपछि अख्तियारले सम्पत्ति छानबिन अघि बढाएको थियो ।
अनुसन्धानलाई टुंगोमा पुर्याउँदै अख्तियारले थापाविरुद्ध बुधबार विशेष अदालतमा मुद्दा दायर गरेको हो । घूसको मुद्दा अझै विशेष अदालतमा विचाराधीन छ ।
प्रतिकृया दिनुहोस