शुक्रबार ३०, साउन २०७७ १०:१९
कालीकोट । कालिकोटको महावै गाउँपालिका-३ नकुमा पहिरोले घर पुरिँदा ६ जनाको मृत्यु भएको छ ।
वडा सदस्य राज बहादुर विष्टको घरमा गएको पहिरोमा वडा सदस्य विष्टका चार र उनका दाजुका दुई सन्तानको ज्यान गएको छ।
बिहीबार राति साढे १२ बजे विष्टको घर पहिरोले पुरिँदा विष्टका दुई छोराहरु १३ वर्षीय पुष्प विष्ट र ११ वर्षीय प्रविन विष्ट, छोरीहरु १८ वर्षीया सबिना विष्ट र १५ वर्षीया आशा विष्ट, वडा सदस्य राजबहादुरका दाजु डिलबहादुर विष्टका छोरीहरु १९ वर्षीया शान्ति विष्ट र १० वर्षीया रेखा विष्टको मृत्यु भएको डीएसपी श्यामबाबु ओलियाले जानकारी दिए ।
स्थानीय बासिन्दा, जनप्रतिनिधि र प्रहरीले घटनास्थलबाट मृतकको शव निकालेको पनि डीएसपी ओलियाले बताए ।
यसैगरी जिल्लाकै नरहरीनाथ गाउँपालिकाको कुमाल गाउँको वडा नम्बर १ मा बिहीबार नै गएको पहिरोमा परि हजुबुवा र नाती गम्भीर घाइते बनेका छन्।
घाइते हुनेमा ७० वर्षका नर बहादुर विष्ट र नाती रत्न बहादुर विष्ट रहेको जानकारी प्रदेश प्रहरीले जनाएको छ। नाती रत्नको भने उमेर खुलेको छैन।
प्रतिकृया दिनुहोस