मङ्गलबार २७, साउन २०७७ ०८:५४
काठमाडाैं । मुलुकभर कोरोना संक्रमण बढेसंगै सरकारले कडा निर्णय गरेको छ । मन्त्रिपरिषद्को सोमबार बसेको बैंठकले भारतबाट आउनेका लागि १० नाका तोकेको छ । यसअघि साउन मसान्तसम्म गरेको सीमा बन्दलाई भदौ ३१ सम्म थपेको छ ।
खुला सीमा भएका कारण भारतबाट नेपाल छिर्नेको भीड बढेपछि यसअघिका २० प्रवेश नाकाबाट घटाएर १० प्रवेश नाका ताेकेकाे हो ।
नेपाल भित्रिनेका लागि झापाको काकडभिट्टा, मोरङ्गको रानी, सिराहाको माडर, रौतहटको गौर, पर्साको वीरगञ्ज, रुपन्देहीको वेलहिया, कपिलवस्तुको कृष्णनगर, बांकेको जमुनाह, कैलालीको गौरीफन्टा र कञ्चनपुरको गड्डाचौकी नाकाबाट प्रवेश गर्न पाउने ब्यवस्था गरेको हो ।
अब सीमा प्रवेश गर्नेको स्वास्थ्य परीक्षण गरेर क्वारेन्टाइनमा राखेर मात्र घर जान पाउने व्यवस्था गरिएको छ । प्रवेश अनुमति दिएका नाका भएका जिल्लामा सम्बन्धित प्रदेश सरकारको समन्वय र नेपाली सेनाको सहयोगमा क्वारेन्टाइनको व्यवस्था गर्ने ब्यवस्था गरिएको छ ।
सीमावर्ती क्षेत्रमा संक्रमण फैलिइरहेकाले नेपाल प्रवेश गर्न तोकिएका नाकाबाहेक अन्यत्रबाट आवतजावत, किनमेल र कामदार ल्याउन नदिने व्यवस्था गर्न सम्बन्धित जिल्ला कोभिड संकट व्यवस्थापन केन्द्रले मिलाउने भनिएको छ ।
काठमाडौं उपत्यकाका तीनवटा जिल्लाभित्र आवतजावत गर्नेबाहेक दुई सय भन्दा बढी सक्रिय संक्रमित भएका जिल्लाबाट अन्य जिल्लामा जान स्थानीय प्रशासनको अनुमति आवश्यक हुने निर्णय पनि गरेको छ ।
यससंगै सरकारले फुटपाथ, खुल्ला ठाउ, ठेला र साइकलमा सञ्चालन भइरहेका तरकारी, फलफूल, खाद्यान्न, लत्ता कपडालगायतका व्यवसाय र कवाडी सङ्कलनजस्ता कामलाई सम्बन्धित स्थानीय प्रशासन र स्थानीय तहले निषेध गर्ने निर्णय गरेको छ ।
प्रतिकृया दिनुहोस