श्रमिकको न्यूनतम पारिश्रमिक वृद्धि

काठमाडाैं । सरकारले औपचारिक क्षेत्रमा काम गर्ने श्रमिकको पारिश्रमिक वृद्धि गरेको छ । यही साउन १ गतेदेखि लागु हुने गरी औपचारिक क्षेत्रका श्रमिकको न्यूनतम पारिश्रमिक मासिक १७ हजार तीन सय रूपैयाँ निर्धारण गरेको हो ।

यस्तै चिया बगानका श्रमिकको न्यूनतम पारिश्रमिक वृद्धि गर्दै १३ हजार आठ सय ९३ रूपैयाँ तोकिएको छ । 

श्रम, रोजगार तथा सामाजिक सुरक्षामन्त्रालयले निर्धारण गरेको पारिश्रमिक आज राजपत्रमा प्रकाशित भएसँगै औपचारिक क्षेत्र र चिया बगानका श्रमिकको न्यूनतम पारिश्रमिक वृद्धि भएको हो । 

वृद्धि भएको पारिश्रमिकमा औपचारिक क्षेत्रमा काम गर्ने श्रमिकको मासिक न्यूनतम पारिश्रमिकमा १० हजार आठ सय २० रूपैयाँ आधारभूत पारिश्रमिक र ६ हजार चार सय ८० रूपैयाँ महंगी भत्ता रहेको छ । यस्तै, प्रतिघण्टा ८९ रूपैयाँ, दैनिक ६ सय ६८ र आंशिक समय मात्र काम गर्ने श्रमिको प्रतिघण्टा ९५ रूपैयाँ पारिश्रमिक निर्धारण गरिएको छ । 

चिया बगानका श्रमिकका हकमा आठ हजार नौ सय ३४ आधारभूत र चार हजार नौ सय ५९ महङ्गी भत्ता गरेर मासिक १३ हजार आठ सय ९३ रूपैयाँ न्यूनतम पारिश्रमिक तोकिएको हो । 

चिया बगानका श्रमिकलाई आधारभूत र महङ्गी भत्ता जोडेर दैनिक पाँच सय रूपैयाँ पारिश्रमिक निर्धारण गरिएको छ । यस्तै, चिया प्रशोधन वा चिया कारखानामा काम गर्ने श्रमिक तथा चिया बगानका सरदार, नाइके र चौकीदारको समेत दैनिक भत्ता ६३ रूपैयाँ निर्धारण गरिएको छ । 

उपर्युक्त पारिश्रमिकका अतिरिक्त श्रम ऐन–२०७४, योगदानमा आधारित सामाजिक सुरक्षा–२०७४, श्रम सम्झौता, नियुक्ति पत्र र श्रमिकले पाउने सञ्चयकोष, उपदानलगायतका सुविधा अनिवार्यरुपमा हुनुपर्ने राजपत्रमा उल्लेख छ ।

न्यूनतम पारिश्रमिक निर्धारण गर्ने अधिकारप्राप्त स्थानीय तह वा अन्य निकायले मन्त्रालयले तोकेको भन्दा कम नहुने गरी न्यूनतम पारिश्रमिक निर्धारण गर्नुपर्ने छ ।