उखुको समर्थन मूल्य तोकियाे

काठमाडौं । सरकारले याे वर्षका लागि उखुकाे समर्थन मूल्य ताेकेकाे छ । बुधबार बसेको मन्त्रिपरिषद् बैठकले उखुको समर्थन मूल्य निर्धारण गरेको हाे।

मन्त्रिपरिषद्ले प्रतिक्विन्टल ५९० रुपैयाँ उखुको समर्थन मूल्य तोकेको हो ।  कृषि मन्त्रालयले सो मूल्य तय गरेर उद्योग वाणिज्य तथा आपूर्ति मन्त्रालयमार्फत मन्त्रिपरिषदमा प्रस्ताव पेश गरेको थियो ।

ताेकिएको समर्थन मूल्यमध्ये ५२० रुपैयाँ उद्योगीले र ७० रुपैयाँ सरकारले अनुदान उपलब्ध गराउने छ । गत वर्षभन्दा सरकारले उखुकाे समर्थन मूल्य प्रतिक्विन्टल करिब ४६ रुपैयाँ बढाएको छ । किसानले ६५० रुपैयाँ ताेकिनुपर्ने माग गर्दै आएका थिए ।

किसान र उद्योगीसँग पटक/पटक छलफल गरी कृषि विभागको टोलीले जिल्लामा गएरै किसानको लागत, ढुवानी खर्च निकालेकाे र  २० प्रतिशत मुनाफा, जिल्लामा चलेको दरको आधारमा प्रस्ताव बनाएर उद्योग मन्त्रालयमा पठाएकाे कृषि सचिव गोविन्द शर्माले बताए ।

सरकारले गत आर्थिक वर्ष २०७७/७८ का लागि प्रतिक्विन्टल ५४४ रुपैयाँ ३३ पैसा निर्धारण गरेको थियो । त्यस्तै अघिल्लो आर्थिक वर्ष २०७६/७७ का लागि ५३६ रुपैयाँ ५६ पैसा तथा आर्थिक वर्ष २०७५/७६ को लागि पनि त्यति नै मूल्य कायम गरिएको थियो । किसानहरुले भने मूल्य नतोक्दै यसअघिबाटै उद्योगीलाई उखु बेच्न थालिसकेका छन् ।