- विशेष खबर मङ्गलबार ०६, माघ २०७७ ०२:००
काठमाडाैं । कोरोना भाइरस महामारीका कारण नेपालको अर्थतन्त्रमा ३ खर्ब २२ अर्बको उत्पादनमा क्षति पुगेको एक अध्ययनले देखाएको छ।
राष्ट्रिय योजना आयोगले गरेको अध्ययनअनुसार महामारीका कारण वार्षिक उत्पादनको वृद्धिदरमा १ खर्ब ६६ अर्बको क्षति पुगेको छ। समग्र क्षतिले गर्दा गएको वर्षको आर्थिक वृद्धिदर ०.६ प्रतिशतमा सिमित भएको छ।
केन्द्रीय तथ्यांक विभागले गएको वर्षको वृद्धिदर २.२७ प्रतिशतको वृद्धिदर कायम हुने अनुमान गरेको थियो। आयोगको अध्ययनले भने वृद्धिदर घट्ने अनुमान गरेको छ।
महामारीका कारण आर्थिक गतिविधि सुस्त भएको, उत्पादन घटेको तथा रोजगारी संकुचित भएको आयोगको निष्कर्ष छ। यी सबै सूचकलाई पहिलेकै अवस्थामा ल्याउनका लागि विभिन्न क्षेत्रमा रणनीतिक लगानी गर्नुपर्ने बताइएको छ।
आयोगले संक्रमण नियन्त्रण तथा राहत, रोजगारी, आयोजनाको निरन्तरता, नयाँ प्रणाली विकास तथा अवलम्वन र आत्मनिर्भरता अभिवृद्धिका लागि लगानी गर्नुपर्ने ठहर गरेको छ।
यो सबैका लागि अल्पकालीन, मध्यकालीन र दीर्घकालीन गरी खर्च गर्दा कूल ६ खर्ब ६५ अर्ब लगानी आवश्यक हुने आयोगको अनुमान छ।
रोजगारीलाई पहिलेकै अवस्थामा पुर्याउनका लागि ९२ अर्ब, संक्रमण नियन्त्रण तथा राहतका लागि २ खर्ब ६९ अर्ब, आयोजना निरन्तरताका लागि १ खर्ब १४ अर्ब, नयाँ प्रणाली विकासका लागि १ खर्ब १९ अर्ब र आत्मनिर्भरता अभिवृद्धिका लागि ७३ अर्ब लगानी आवश्यक हुने छ।
प्रतिकृया दिनुहोस