शनिबार १०, साउन २०७७ ०९:४३
काठमाडौं । नेपाली कांग्रेसले पार्टीका पुराना दुई नेतासहित तीन जनालाई पार्टीबाट निष्काशन गरेको छ ।
शनिबार बसेको कांग्रेस नेता भिष्मराज आङदम्बे नेतृत्वको अनुशासन समिति बैठकले पार्टीका पूर्व सहमहामन्त्री र पटक–पटक मन्त्री भइसकेका गोविन्दराज जोशी, पूर्व राज्यमन्त्री समेत रहेका महासमिति सदस्य पुष्करनाथ ओझा र पार्टी सभापति शेरबहादुर देउवाको गृह जिल्ला डडेलधुराका पार्टी कार्यालय सचिव रामबहादुर विष्टलाई निष्काशन गरेको हो ।
जोशी र ओझालाई पाँच बर्षका लागि र विष्टलाई तीन वर्षका लागि निष्काशन गर्ने निर्णय भएको कांग्रेस केन्द्रीय कार्यालयबाट जारी विज्ञप्तिमा उल्लेख छ । उनीहरुलाई समितिले फागुन १९ गते अन्तिम स्पष्टीकरण सोधेको थियो ।
स्पष्टीकरण चित्तबुझ्दो नभएको उल्लेख गर्दै पार्टी विधान अनुसार कारवाही गरिएको समितिले जनाएको छ ।
०७४ काे निर्वाचनमा जोशीले पार्टीका बरिष्ठ नेता रामचन्द्र पौडेल र ओझाले सभापति देउवा पत्नी आरजु राणालाई हराउन मुख्य भूमिका खेलेको आरोप छ । तनहूँ क्षेत्र नं १ बाट आधिकारिक उम्मेदवार बनेका पौडेलबिरुद्ध जोशीले बागी उम्मेदवारी हालेका थिए ।
उनीबिरुद्धको भ्रष्ट्राचारको मुद्दा अदालतमा विचाराधीन रहेको कारण देखाउँदै निर्वाचन आयोगले जोशीको उम्मेदवारी बदर गरे पनि आधिकारिक उम्मेदवारलाइ असहयाेग गरेकाे आरोप छ ।
अर्का नेता ओझामाथि आरजुलाई हराउन भूमिका खेलेकाे आरोप छ । आरजु कैलाली–५ बाट उम्मेदवार थिइन् । ओझाकाे कैलालीमा राम्राे प्रभाव छ ।
डडेलधुरा पार्टी कार्यालयका सचिव विष्टमाथि पनि अन्तरघातको आरोप छ । उनीहरुबिरुद्ध सम्वन्धित जिल्लाको क्षेत्र र जिल्ला कार्यसमितिबाट कारवाहीको उजुरी परेको थियो ।
प्रतिकृया दिनुहोस